Jonah 1 Again: Mapping Structure and Prosodic Flow

Mapping structure and prosodic flow is an instructive exercise in visual learning. In the process, the semantic organization of the text becomes transparent.

Below I make a colorful attempt at bringing out the structure and prosody of Jonah 1. Go here for a first attempt and a corresponding translation. Pink marks fully explicit references to narrative protagonists. Light blue marks quotative frames. Yellow, red, grey, and green mark words in paradigmatic relationships.

וַיְהִי דְּבַר־יְהוָה   אֶל־יוֹנָה בֶן־אֲמִתַּי לֵאמֹר

 

קוּם לֵךְ      אֶל־נִינְוֵה הָעִיר הַגְּדוֹלָה

וּקְרָא עָלֶיהָ    כִּי־עָלְתָה רָעָתָם לְפָנָי

 

וַיָּקָם יוֹנָה לִבְרֹחַ תַּרְשִׁישָׁה    מִלִּפְנֵי יְהוָה

וַיֵּרֶד יָפוֹ     וַיִּמְצָא אָנִיָּה  בָּאָה תַרְשִׁישׁ  וַיִּתֵּן שְׂכָרָהּ

וַיֵּרֶד בָּהּ   לָבוֹא עִמָּהֶם תַּרְשִׁישָׁה   מִלִּפְנֵי יְהוָה

 

וַיהוָה הֵטִיל רוּחַ גְּדוֹלָה אֶל־הַיָּם

וַיְהִי    סַעַר גָּדוֹל בַּיָּם וְהָאֳנִיָּה חִשְּׁבָה לְהִשָּׁבֵר

 

וַיִּירְאוּ הַמַּלָּחִים  וַיִּזְעֲקוּ אִישׁ אֶל־אֱלֹהָיו

וַיָּטִלוּ אֶת־הַכֵּלִים אֲשֶׁר בָּאֳנִיָּה אֶל־הַיָּם לְהָקֵל מֵעֲלֵיהֶם

 

וְיוֹנָה יָרַד  אֶל־יַרְכְּתֵי הַסְּפִינָה  וַיִּשְׁכַּב וַיֵּרָדַם

 

וַיִּקְרַב אֵלָיו  רַב הַחֹבֵל

וַיֹּאמֶר לוֹ

מַה־לְּךָ נִרְדָּם קוּם קְרָא אֶל־אֱלֹהֶיךָ

אוּלַי יִתְעַשֵּׁת  הָאֱלֹהִים לָנוּ  וְלֹא נֹאבֵד

 

וַיֹּאמְרוּ אִישׁ אֶל־רֵעֵהוּ

לְכוּ וְנַפִּילָה גוֹרָלוֹת  וְנֵדְעָה בְּשֶׁלְּמִי  הָרָעָה הַזֹּאת לָנוּ

וַיַּפִּלוּ גּוֹרָלוֹת וַיִּפֹּל הַגּוֹרָל עַל־יוֹנָה

 

וַיֹּאמְרוּ אֵלָיו

הַגִּידָה־נָּא לָנוּ בַּאֲשֶׁר לְמִי־הָרָעָה הַזֹּאת לָנוּ

מַה־מְּלַאכְתְּךָ  וּמֵאַיִן תָּבוֹא

מָה אַרְצֶךָ וְאֵי־מִזֶּה עַם אָתָּה

 

וַיֹּאמֶר אֲלֵיהֶם

עִבְרִי אָנֹכִי וְאֶת־יְהוָה אֱלֹהֵי הַשָּׁמַיִם  אֲנִי יָרֵא

אֲשֶׁר־עָשָׂה אֶת־הַיָּם  וְאֶת־הַיַּבָּשָׁה

 

וַיִּירְאוּ הָאֲנָשִׁים יִרְאָה גְדוֹלָה

וַיֹּאמְרוּ אֵלָיו

מַה־זֹּאת עָשִׂיתָ כִּי־יָדְעוּ הָאֲנָשִׁים

כִּי־מִלִּפְנֵי יְהוָה הוּא בֹרֵחַ

כִּי הִגִּיד לָהֶם

 

וַיֹּאמְרוּ אֵלָיו

מַה־נַּעֲשֶׂה לָּךְ    וְיִשְׁתֹּק הַיָּם מֵעָלֵינוּ

כִּי הַיָּם הוֹלֵךְ וְסֹעֵר

 

וַיֹּאמֶר אֲלֵיהֶם

שָׂאוּנִי וַהֲטִילֻנִי אֶל־הַיָּם  וְיִשְׁתֹּק הַיָּם מֵעֲלֵיכֶם

כִּי יוֹדֵעַ אָנִי

כִּי בְשֶׁלִּי הַסַּעַר הַגָּדוֹל הַזֶּה עֲלֵיכֶם

 

וַיַּחְתְּרוּ הָאֲנָשִׁים  לְהָשִׁיב אֶל־הַיַּבָּשָׁה

וְלֹא יָכֹלוּ  כִּי הַיָּם הוֹלֵךְ וְסֹעֵר עֲלֵיהֶם

 

וַיִּקְרְאוּ אֶל־יְהוָה וַיֹּאמְרוּ

אָנָּה יְהוָה אַל־נָא נֹאבְדָה בְּנֶפֶשׁ הָאִישׁ הַזֶּה

וְאַל־תִּתֵּן עָלֵינוּ  דָּם נָקִיא

כִּי־אַתָּה יְהוָה   כַּאֲשֶׁר חָפַצְתָּ עָשִׂיתָ

 

וַיִּשְׂאוּ אֶת־יוֹנָה  וַיְטִלֻהוּ אֶל־הַיָּם

וַיַּעֲמֹד הַיָּם מִזַּעְפּוֹ

 

וַיִּירְאוּ הָאֲנָשִׁים  יִרְאָה גְדוֹלָה  אֶת־יְהוָה

וַיִּזְבְּחוּ־זֶבַח לַיהוָה וַיִּדְּרוּ נְדָרִים